Betre inkludering av små og mellomstore bedrifter

I talen orienterte statsråd Rigmor Aaserud om NHD er i ferd med å utarbeida ein eigen strategi for små og mellomstore bedrifter. Dette skjer som oppfølging av innovasjonsmeldinga frå 2008. Betre inkludering av desse bedriftene ved offentlege innkjøp vart lansert som ei viktig strategisk satsing.

Innanfor det eksisterande innkjøpsregelverket presiserte statsråden særleg seks tiltak for betre inkludering av små og mellomstore bedrifter:

1. Opning for deltilbod på kontraktar og unngå samanslåing av enkeltkontraktar til store kontraktar.
2. Ein bør unngå unødvendig strenge krav til finansiell og teknisk kompetanse hos leverandørane.
3. Oppdragsgjevarar kan gje betre tilgang til informasjon om mindre kontraktar, bl. a. gjennom fleire friviljuge kunngjeringar på Doffin.
4. Auka bruk av rettleiande kunngjeringar.
5. Bevisst bruk av rimelege og balanserte kontraktsvilkår.
6. Leverandørutviklingstiltak for å gjera små og mellomstore bedrifter i stand til å samarbeida for å konkurrera om større kontraktar, t.d. der det er samarbeid på oppdragsgjevarsida.

Aaserud poengterte vidare at det ikkje er regelverket som avgrensar små og mellomstore bedrifter sitt høve til å delta i offentlege konkurransar, men oppdragsgjevarar sin evne til å sjå og nytta handlingsrommet som ligg i regelverket for tilpassing av konkurransane.

Heile talen kan du lesa her.